Базарсад бурхан

Доржсэмбэ (Базарсад)

Ум базар садан а хум суухаа, ум гэли суухаа

Түвд: Дорж сэмба,

Монгол: Очирт баатар сэтгэлтэн

Гурван хөх мэнгэтэй хүмүүсийн ивээх бурхан нь Доржсэмбэ буюу Базарсад бурхан юм. Бие, хэл, сэтгэл гурваа ариун байлгахыг ерөөн тарниа уншдаг.

Гурван хөх мэнгэтэй хүмүүсийн төрсөн он: 1907, 1916, 1925, 1934, 1943, 1952, 1961, 1970, 1979, 1988, 1997, 2006, 2015 юм.

Хүн урьд өмнөх олон төрлүүддээ ямар үйл хийж, үйлийн үр хурааснаа мэдэхгүй, гэнэт болон зуурдаар хорвоог орхиж ч мэднэ, тиймээс цаг алдалгүй нүгэл хилэнц бүхнээ ариусгах аргуудад шамдах хэрэгтэй, Базарсад буюу Очир баатар сэтгэлт бурхны 100 үсэгт хэмээх тарнийг өдөр бүр 21 удаа мөн түүнээс унших нь маш их тустай юм. Үйлдсэн муу үйлийн үрийг заавал эдлэхгүйгээр арилгах боломжийг бурхан нигүүлсэхүйгээрээ олгожээ.
“Ум Вазра саду самаяа, ману балаяа, вазра саду диноба диста, дэдохоё мэвава, судохоё мэвава, субохоё мэвава, ану рагдо мэвава, сарва сидди, мэбра язца, сарва гарма сузамэ, зидам шриям, гүрү хум, ха ха ха ха хо, вага вана, сарва дата гада, вазра мамэ мүняза, вазра вава, маха самаяа, саду аа хум пад” хэмээн зуун үсэгт тарнийг 21-н удаа сэтгэл алгасруулалгүй тоол.
Тус эрдэм нь:
– Зуун үсэгт тарни үүнийг өдөр бүрийн үүрээр 21 уншсанаар хилэнц уналын арвижлагыг таслана
– 100 мянга тоолвол хураасан хилэнц түйтгэр бүгд арилна
– Мөн завсаргүй таван нүглийг үйлдсэн хийгээд
– Түүнчлэн ирсэн бүгдийг хуурсан
– Дээдийн номыг тэвчсэн гэм
– Юу үйлдсэн хилэнц бүгд арилна.
– Зуун үсэгтийг урин бясалгасан бүтээлчинд Вазра саду батдах хийгээд шид бүтээл бүгдийг олно.
– Энэхүү зуун үсэгт нь Түүнчлэн ирсэн бурхан бүгдийн зүрхэн шим
– Зуун үсэгтийг үргэлж урин тоолсноор өөрийн үлэмжийн бурхдын шид бүтээл түргэн бүтэх бөгөөд
– Идам бурханыг өөрт ойртуулахыг хүсэгч бүгд зуун үсэгт дор увидас мэт шамдвал аньс ихтэй.

Базар сад буюу Зуун үсэгт тогтоол.

Базар сад нь Доржсэмба бурхны тарни юм.
Бид өдөр бүр их, бага хэмжээгээр хилэнц уналыг үйлдсээр байдаг бөгөөд бидний үйлдсэн хилэнц унал нь маргааш нь хоёр, нөгөөдөр нь дөрөв, нөгөөдрийн маргааш гэхэд найм болох зэргээр үржигдэн арвижсаар байдаг.
Тиймээс өчүүхэн жижиг амьтан алсан үйлээр олон төрөлдөө зовлонг амсдаг учир нь ийм болно.
Харин Зуун үсэгт тогтоол буюу Базар садыг өдөрт 21 удаа тасталгүй, өөрийн хийсэн хилэнц уналдаа сэтгэлийн гүнээс гэмшин наминчлан уншваас бидний хийсэн хилэнц уналын арвижих үүдийг хорьдог хэмээн номонд өгүүлдэгийн дээр багш нар ч айлддаг билээ.
Харин өдөрт зуун удаа үргэлж тоолохын дээр ахин хилэнц нүгэлийг үл үйлдэхийг бат тангараглан наминчилах аваас үйл барагдах тус эрдэмтэй бөгөөд тухайн үйлийг хойшид ахин үйлдэхгүй хэмээн тангарагласан хэрнээ үйлдвээс бурхдын өмнө худал өгүүлсэний их гэмтэй байдаг хэмээн айлдсан байдаг.
Ялангуяа багш садныг шүтэх ёсонд сэв оруулсан болоод нууц тарнийн тангараг санваарыг доройтуулсан нүгэл хилэнц нь асар хүнд хилэнц тул Зуун үсэгтийн тогтоолоор наминчилдаг.
Тиймээс наминчилгын хаан мэт тогтоол юм.

Зуун үсэгт тарнийг галиглавал:

Ум важра садува самаяа.
Манү балаяа.
Важра садува диноба диста.
Дидо мэвава.
Сүдо хояа мэвава.
Сүбо хояа мэвава.
Анү рагдо мэвава.
Сарва сиддхи мэбра язца.
Сарва гарма сү замэ.
Зидам шри ям гүрү хун ха ха ха ха хо.
Ванга вана сарва датагада важра мамэ. Мунжа важри вава.
Маха самаяа садува хун пад.